“Qarabağ”la oyuna yaxşı hazırlaşmaq üçün…”

Avropa Liqasının qrup mərhələsində “Qarabağ”la rəqib olan “Sent Etyen” qrafikin sıxlığına görə narahatdır. Allsport.az xəbər verir ki, bunu Fransa mətbuatına açıqlamasında “yaşıllar”in yarımmüdafiəçisi Fabyen Lemua deyib.

27 yaşlı futbolçu Ağdam klubu ilə cavab oyunu öncəsi Liqa 1-də “Nant”a qarşı keçirəcəkləri qarşılaşmanın tarixinin dəyişdirilməsini istəyir: “Mən başa düşə bilmirəm, nəyə görə “Nant”la matçımızı bazar günü oynamalıyıq? Axi bizim “Qarabağ”la görüşə yaxşı hazırlaşmağımız üçün cəmi 4 gün vaxtımız qalacaq. Onsuz da gərgin qrafiklə mübarizə aparırıq”.

Qrupun ikincilik uğrunda, demək olar ki, həlledici “Sent Etyen” – “Qarabağ” dueli noyabrın 27-də baş tutmalıdır. Fransızları 4 gün əvvəl isə I Divizionun iddialılarından “Nant”la çətin səfər gözləyir.