Stolüstü tennisçilər Çinə yollanıblar

Azərbaycanın stolüstü tennisçiləri beynəlxalq yarışlara hazırlığı davam etdirirlər. Allsport.az saytı xəbər verir ki, daha 6 idmançı bu məqsədlə bu gün Çin Xalq Respublikasına yola düşüb.

Zemfira Mikayılova, Mərziyyə Nurmətova, Ləman Abdulhəmidova, Aylin Əsgərova, Rüstəm Hacılı və Adil Əhmədzadə mayın 27-dək baş məşqçi Fərhad İsmayılovun rəhbərliyi ilə Çinin Hebey əyalətinin paytaxtı Şijiazuanq şəhərində yerli idmançılarla birgə məşq proseslərində iştirak edəcək.

İdmançılar beynəlxalq təlim-məşq toplanışının ardınca Qazaxıstanda keçiriləcək Avrasiya liqasına qatılacaqlar. Qızlar mayın 28-dən 31-dək Astana, oğlanlar isə Taraz şəhərində təşkil olunacaq yarışda mübarizə aparacaqlar.