“Qəbələ”nin gənclər liqasında potensial rəqibləri bəlli oldu

Sabah UEFA gənclər liqasında 2020-2021-ci illər mövsümünün ilk püşkatma mərasimi keçiriləcək. Bakı vaxtı ilə saat 15:00-da başlayacaq tədbirdə çempionlar liqası yolu və çempionlar yolunda 1/32 final mərhələsinin cütləri bəlli olacaq.

Allsport.az xəbər verir ki, AFFA-nın keçirdiyi gənclər liqasında Azərbaycan çempionu olan “Qəbələ”nin 19 yaşadək futbolçulardan ibarət komandasının da rəqibi müəyyənləşəcək.

Püşkatmadan öncə UEFA iştirakçıları qruplara bölüb. Hər qrupda yer alan 8 komanda püşkdə 4 cüt təşkil edəcək. “Qəbələ” çempionlar yolunda 4-cü qrupa daxil edilib. “Qırmızı-qaralar”ın potensial rəqibləri “Çertanovo” (Rusiya), “Dinamo” (Minsk, Belarus), “Kayrat” (Qazaxıstan), “Makkabi” (Hayfa, İsrail), “Ludoqorets” (Bolqarıstan), “Şkendiya” (Şimali Makedoniya) və “Şerif” (Moldova) klublarıdır.

Martın 2-3-də keçiriləcək 1/32 final mərhələsi bir oyundan ibarətdir.

Həmin kateqoriyadan