Stend atıcılığı üzrə ölkə kubokunun açılışı olub

Mayın 12-də Bakı atıcılıq mərkəzində stend atıcılığı üzrə ölkə kuboku başlayıb. Allsport.az saytı xəbər verir ki, mayın 15-dək davam edəcək yarış stend atıcılığının səngər və dairəvi növlərində – kişilər, qadınlar və qarışıq komanda kateqoriyalarında keçiriləcək.

Turnirə ölkəmizin müxtəlif şəhər və rayonlarından, ümumilikdə 41 idmançı qatılıb. Yarışın birinci günündə 22 atlet – qarışıq komanda növündə 10, qadın və kişilərin fərdi kateqoriyası turnirində 12 idmançı gücünü sınayır.

Bu gün tədbirin açılışı olub. AAF-in baş katibi Emin Cəfərov turnirin təşkil edilməsində əsas məqsədin beynəlxalq yarışlarda idmanın bu növündə ölkəmizi yüksək səviyyədə təmsil edə biləcək istedadlı gənclərin aşkarlanması olduğunu bildirib.