Türkiyə atıcılarından Bakıda ilk müjdə

Atıcılıq üzrə dünya kubokunun 2-ci günündə Türkiyə komandası qaliblər sırasında olub

Allsport.az xəbər verir ki, qarışıq komandalar arasında 10 metr məsafəyə pnevmatik tüfəngdən atəş üzrə finala düşən 2 Çin komandasından biri (Yuting Hvang və Lihao Şenq) qızıl, digəri (Jiling Vanq – Aoran Yanq) gümüş medala sahib olub. Həmyerlilər finalı 16:14 hesabı ilə tamamlayıblar.

Çex komandasını təmsil edən Aneta Brabçova – Frantisek Smetana cütlüyü 17:11 hesabı ilə Macarıstan təmsilçilərini önə çıxaraq bürünc medala yiyələniblər.

Ötən il Bakıda bol medallarla yadda qalan Türkiyə komandası bu gün ilk medalını qazanıb.

Qarışıq komanda növündə 10 metr məsafəyə pnevmatik tapançadan atəş üzrə türkiyəli Şimal İlmaz və İsmayıl Kələş cütlüyü İtaliya komandasını 17:9 hesabı ilə önləyərək bürünc medala layiq görülüb.

Hindistanlı Divya Tadigol Subaraju və Sarabjot Sinqh serbiyalı Zorana Arunoviç və Damir Mikeç duetinə 16:14 hesabı ilə qalib gələrək, yarışın qızıl medalçısı olublar.