Ölkə idmanında istefalar başladı: Nazirliyin yaxın tərəfdaşı vəzifəsini təhvil verdi!

Azərbaycan triatlon federasiyasının prezidenti Elçin Əliyev istefa verib. Allsport.az saytı xəbər verir ki, o, bununla bağlı açıqlama verib: “Bu müddət ərzində davamlı olaraq müxtəlif formatlı idman yarışları keçirilib, triatlonla məşğul olanların sayı dəfələrlə artıb, ölkədə triatlon klubları yaradılıb. Uşaqların bu idmana cəlb olunması istiqamətində davamlı iş aparılıb, ölkədə onlar üçün müxtəlif yarışlar təşkil olunub.

Qeyd etməliyəm ki, mənim əsas fəaliyyətim innovasiyalarla baglıdır və hazırda mənim rəhbərliyim altında Azərbaycanda və bir sıra xarici ölkələrdə mürəkkəb innovativ layihələr üzərində iş gedir və bununla yanaşı il ərzində mənim silsilə ezamiyyətlərim planlashdırılıb. Buna görə də qeyd etməliyəm ki, vaxt azlığı ilə əlaqədar olaraq mənim federasiyanın işində əvvəlki həcmdə aktiv iştirak imkanım olmayacaq.

Əlavə olaraq bütün tərəfdaşlara dərin minnətdarlığımı bildirirəm: əsas tərəfdaş gənclər və idman nazirliyi, Bakı su idmanı sarayı, ASAN innovasiya mərkəzi, BCC, PMD, “Finoko”, “Aquavuta”, “Metak, “Alufar” və “Nərəkənd”. Bununla yanaşı, mən triatlonun inkişafında gələcəkdə də mövcud zaman resursları çərçivəsində iştirak etməyə hazıram və öz təcrübəmlə bundan sonra da bu idman növünün Azərbaycanda inkişafına öz töhfəmi verəcəyəm”.

Elçin Əliyev 2021-ci il dekabrın 21-də ATF-ə prezidenti seçilmişdi. Triatlon olimpiya idman növüdür.