Boks millimiz kubalı mütəxəssisə tapşırılıb

Kişi boksçulardan ibarət yığmamızda yeni baş məşqçi təyinatı rəsmiləşib. Allsport.az saytı xəbər verir ki, milli kubalı Umberto Orta Dominqezə həvalə edilib. 53 yaşlı mütəxəssislə 1-illik müqavilə imzalanıb. O bu postda Nəriman Abdullayevi əvəzləyib.

Umberto Orta 1966-cı ildə Kubanın Kamaquey şəhərində anadan olub. 1984-cü ildə ölkəsində Bədən Tərbiyəsi İnstitutunu bitirən mütəxəssis boks məşqçisi ixtisasına yiyələnib.

O, 1984-1992-ci illərdə Kamaqueyin idman məktəbində boks müəllimi işləyib. U. Ortanın ardınca yığma karyerası başlayıb. Kubanın yeniyetmələrdən və gənclərdən ibarət yığmalarında çalışan mütəxəssis 1992-2005-ci illərdə məşqçi, növbəti 11 ildə baş məşqçi kimi işləyib. Mütəxəssis bu müddətdə 18 dünya birinciliyi, 1 dünya çempionatı, 2 Yeniyetmələrin Yay Olimpiya Oyunlarına komanda çıxarıb. Onun yetirmələri dünya birinciliklərində 80, Olimpiadalarda 9 qızıl medal qazanıb.

London-2012 və Rio-2016 oyunlarında Kubanı təmsil edən 10 boksçudan 9-u müxtəlif yaş qruplarında onun rəhbərliyi ilə çalışıblar. 2016-cı ilin oktyabrında mütəxəssis Rusiya yığmasına məşqçi təyin olunub. O, 1 il burda işlədikdən sonra qonşu ölkədə fəaliyyətini klubda davam etdirib.

Nəriman Abdullayev isə əvvəlki kimi, yenə böyük məşqçi funksiyasını yerinə yetirəcək.