İlkin Əhədov: “Ürəkdə inam olsa, insan istədiyinə nail olar”

Badamlı Azərbaycan kubokunda mübarizə sona yaxınlaşır. Allsport.az saytı xəbər verir ki, aprelin 26-da yarımfinal görüşləri keçiriləcək. Cütlüklərdən biri aşağı, digəri yüksək dəstə komandasıdır. 1-ci liqada baxımlı və əzmkar oyunu ilə seçilən “Alyans Qrup” mövsümü titulla başa vurmaq istəyir. Bəs həllledici mərhələyə bir addım qalmış baş məşqçi İlkin Əhədov nə düşünür? Sitat:

“Qış fasiləsindən sonra komandamız üçün müəyyənləşdirdiyimiz hədəflərdən biri də Azərbaycan kubokunun yarımfinalına yüksəlməkdir. Çətin də olsa, buna nail olduq. İndi finaldan bizi 1 oyun ayırır. Əlbəttə, güclü bir rəqiblə qarşılaşacağıq. Aydın məsələdir ki, bu mərhələdə zəif komanda axtarmaq sadəlövhlük olardı.

Amma gücümüzdən sona qədər istifadə edəcəyik ki, yeni məqsədimizi reallaşdıraq. Hazırda komandada cəzalı, zədəli futzalçı yoxdur. Bu da bizi sevindirir. Əhvalımız da yüksək vəziyyətdədir. Hamımız qələbə əzmi ilə hazırlaşırıq. Futzalçılarıma deyir ki, ürəkdə inam olsa, insan istədiyinə nail olar”.

Bakı idman sarayında “Alyans Qrup”un rəqibi 1-ci liqa təmsilçisi “Forza Neftçi” olacaq.