Milli Olimpiya Stadionundan son görüntülər

Milli Olimpiya Stadionu hazır olmaq ərəfəsindədir. Allsport.az saytının məlumatına görə, 185 gündən sonra Avropa Oyunlarının açılışı burada reallaşacaq. Bütün Azərbaycan bu tarixi səbirsizliklə gözləyir.

Nəzərinizə çatdıraq ki, bu böyük idman qurğusu öz müasir tikinti üslubu ilə fərqlənəcək. Xüsusi gözəlliyi ilə seçiləcək 65 min tamaşaçı yeri olan Bakı Olimpiya Stadionunun özəlliyi, müxtəlif funksiyalı tribunaların, qaçış zolağının və digər müasir infrastrukturunun olmasıdır.

Daxili sahəsi 120,830 kvadratmetr olacaq 6 mərtəbəli stadionda tikinti işləri Beynəlxalq Tikinti Standartına (İBC), UEFA və FİFA standartlarına və Azərbaycanın inşaat normativlərinə uyğun aparılır. Arenanın layihələndirilməsi ilə bağlı ilkin işlərə 2008-ci ildən başlanıb.

Tanınmış foto-müxbir Dilavər Nəcəfov bu gün ölkənin ən nəhəng arenasının şəkillərini çəkib yayımlayıb. Xatırladaq ki, həmkarımız keçən həftə İngiltərədə keçirilmiş foto müsaqibədə qalib olub.

Onun Pekin-2008-də cüdo, London Olimpiadasında bədii gimnastikada çəkdiyi kadrlar, milyonlarla fotonun arasında TOP-10 daxil olub.