“Qarabağ”ın tarixində yeni göstərici

“Qarabağ” tarixinin yeni rekordunu müəyyənləşdirib. Allsport.az saytı xəbər verir ki, Ağdam klubu evdə məğlubiyyətsizlik zolağında premyer liqada ən yaxşı nailiyyətini göstərib. Qurban Qurbanovun komandası buna 17-ci turda “Zirə” ilə matçında nail olub.

2:0 hesabı ilə qalib gələn “Qarabağ” öz meydanındakı yenilməzliyini 32 oyuna çatıdırıb. Ağdamlılar sonuncu dəfə 2015-ci il fevralın 28-də doğma meydanda uduzmuşdu. Həmin vaxt “Qəbələ”yə 0:1 hesabı ilə məğlub olan Qurbanovun yetirmələri arxada qalan 2 il ərzində evdə 26 qələbə qazanıb və 6 heç-heçə edib.

Bununla da “Qarabağ” klub tarixinin rekordunu arxada qoyub. Ağdamlılar 1992-93-cü illərdə ardıcıl 31 ev oyununda uduzmamışdı. Bu, ümumilikdə Azərbaycan futbolu tarixində 7-ci nəticənin təkrarıdır.