Tural Bayramovdan qələbə

Moldovada K-1 üzrə beynəlxalq qran-pri turniri keçirilib.  Allsport.az saytı xəbər verir ki, yarışda Azərbaycanı 2 idmançı təmsil edib.

75 kq-da ölkəmizi təmsil edən idmançımız Tural Bayramov – Moldova döyüşçüsü Sergey Morariylə dueldən qalib ayrılıb. Döyüş ərzində rəqibə heç bir şans verməyən Bayramov parlaq qələbəylə zaldakı tamaşaçıların alqışını qazanıb.

Digər idmançımız 84 kq-da çıxış edən Ruslan Kobzev moldovalı Denis Apavaloaya qarşı döyüşdə məğlubiyyət acısı yaşayıb. Turnir zamanı K-1-in Azərbaycan və Yaxın Şərq üzrə rəsmi nümayəndəsi Elnur Məmmədov Moldovanın sabiq prezidenti Vladimir Voroninlə görüşüb.

Qeyd edək ki, Moldova turnirində qələbə qazanan Tural Bayramov gecənin əzmkar döyüşçüsü seçilib.