İspaniya klubunda yeni dövr

“Valensiya” klubu mülkiyyət strukturunda mühüm dəyişikliyi elan edib.

Allsport.az xəbər verir ki, İspaniya təmsilçisi klubun 42 faizlik səhm paketini ABŞ-nin “Pitchvise Holdings” konsorsiumuna satıb.

Mütəxəssislər tərəfindən ümumi dəyəri 1,25 milyard avro qiymətləndirilən bu saziş nəticəsində “Valensiya”ya dərhal 100 milyon avro məbləğində yeni kapital daxil olacaq.

Böyükhəcmli satışa baxmayaraq, “Meriton Holdings” və Piter Lim əsas səhmdar mövqeyini qoruyub saxlayıblar. Kiat Lim də klub prezidenti vəzifəsində fəaliyyətini davam etdirəcək. Enn Rodriges və Kori Vulfolkun rəhbərlik etdiyi “Pitchvise Holdings” qrupu KKR təsisçiləri Corc Roberts və Henri Kravis kimi nəhəng korporativ investorlar tərəfindən dəstəklənir.

Klub prezidenti Lim bu tərəfdaşlığın “Valensiya” üçün yeni bir dövrün başlanğıcı olduğunu vurğulayıb. Məqsəd kişi və qadın komandalarının Avropa arenasında sabit mübarizə aparmasını təmin etmək, akademiyanı dünya səviyyəli istedad fabrikinə çevirmək və gələn yay istifadəyə veriləcək yeni “Nou Mestalya” stadionunu regionun əsas idman mərkəzinə çevirməkdir.

“Nou Mestalya” arenası İspaniyanın ev sahibliyi edəcəyi DÇ-2030-un da əsas məkanlarından biri olacaq.