Yunanıstan basketbolunda hakim qalmaqalı

Yunanıstan basketbolunda danışılmış oyunlarla bağlı araşdırma genişlənib.

Allsport.az xəbər verir ki, daha 7 hakim oyunların nəticələrinin manipulyasiyasında mümkün iştirakları ilə bağlı izahat verməyə çağırılacaq.

Onlardan üçü Yunanıstan çempionatının yüksək divizionunun oyunlarını idarə edib.

Bundan başqa, çirkli pulların yuyulmasına qarşı mübarizə idarəsi daha 5 nəfərlə bağlı ayrıca araşdırma aparır.

İş üzrə ilkin mərhələdə danışılmış oyunların təşkili və rüşvət verməkdə şübhəli bilinən 6 nəfərin həbsinə order verilib. Onların arasında yaxın vaxtlarda avroliqa matçlarını idarə etmiş 3 hakim də olub.

Qalmaqal Yunanıstan basketbolunun rəhbərliyində də dəyişikliklərə səbəb olub. Milli federasiyanın prezidenti işlə əlaqəli olduğu üçün vəzifəsindən istefa verib.