2 ay oynamaya bilər

“Yuventus”un futbolçusu Kənan Ulduz ciddi zədə problemi ilə üzləşib.

Allsport.az xəbər verir ki, 21 yaşlı futbolçunun zədə səbəbindən əməliyyat olunması variantı nəzərdən keçirilir. Türkiyə millisinin üzvünün cərrahi müdaxiləyə ehtiyac yaranacağı halda ən azı iki ay yaşıl meydanlardan kənarda qalacağı gözlənilir.

Kenan son olaraq “A” seriyasının “Frozinone” ilə matçından sonra sol ayağında problem hiss edib və müayinədən keçib.

“Yuventus” hazırda futbolçunun müalicəsinin hansı üsulla davam etdiriləcəyini müəyyənləşdirməyə çalışır.

Bu zədə Ulduzun gələcəyi ilə bağlı transfer söz-söhbətlərinin artdığı vaxta təsadüf edib. Türkiyəli vingerin adı son günlər İngiltərənin “Arsenal” klubu ilə hallanır. London təmsilçisinin onu hücum xəttini gücləndirmək üçün əsas namizədlərdən biri hesab etdiyi bildirilir.

Kənan Ulduzun “Yuventus”la müqaviləsi 2030-cu ilin yayına qədərdir.