“Bu, açıq-aydın qırmızı vərəqə idi. Messi meydandan qovulmalı idi”

ESPN ekspertləri Nedum Onuoha və Alexandro Moreno, Lionel Messinin Əlcəzairə qarşı matçın ilk hissəsində etdiyi kobud qayda pozuntusu (foto) barədə dəqiq fikirlərini bildiriblər. Allsport.az saytı xəbər verir ki, argentinalı futbolçu sonda het-trik edərək komandasına 3:0 hesablı qələbə qazandırıb və qayda pozuntusuna görə sarı vərəqə belə almayıb. Moreno təqaüdə çıxdıqdan sonra televiziyada işləməyə başlayan keçmiş venesuelalı futbolçudur, Onuoha isə keçmişdə “Mançester Siti” və “Kvins Park Reyncers”in müdafiəçisidir.

Onuoha: “Məncə, bu, açıq-aydın qırmızı vərəqə idi. Düşünürəm ki, hakimlər sadəcə hadisəni görməzdən gəldilər. Təkrarda vəziyyət çox pis görünürdü; oyunçularla birbaşa, kobud təmas var idi. Lakin rəsmi ingilisdilli yayımda şərhçilər qəribə davrandılar və sadəcə olaraq “Messinin təzyiq göstərdiyini görmək çox xoşdur” dedilər”.

Moreno: “Nedumla tamamilə razıyam. Bu, Lionel Messi üçün qəti qırmızı vərəqədir. VAR hakimləri müdaxilə etməli və hakimə məsləhət verməli idilər, çünki bu qayda pozuntusu rəqibin sağlamlığı üçün son dərəcə təhlükəli idi. Təəssüf ki, hakimlər çox vaxt futbolun ən böyük ulduzlarına qarşı xüsusi, həddindən artıq yumşaq münasibət bəsləyirlər”.