Ceyran və nar Avropa Oyunlarının rəsmi simvolu oldu

Bakı-2015, bu gün ceyran və narı ilk dəfə olaraq keçiriləcək idman tədbirinin rəsmi simvolları kimi təqdim edib. Allsport.az saytı xəbər verir ki, sözü gedən rəmzlər Azərbaycanın təbiətindən və irsindən ruhlanaraq,  ölkənin qürurlu tarixini və ümidverici gələcəyini əks etdirir. Bu cütlük Bakı 2015-in təbliğatında brend rolunda çıxış edərək, bütün dünyada 1-ci Avropa Oyunlarının simvoluna çevriləcək.

Gənclər və İdman naziri Azad Rəhimov bu hadisə barədə belə açıqlama verib: “Bütün dünyaya ceyran və narı təqdim etməyə olduqca şadıq və ümid edirik ki, onlar birinci Avropa Oyunları həyəcanını özlərində əks etdirə biləcəklər. Bakı-2015-in simvolları kimi onlar Azərbaycanda yeni nəsil idman azarkeşlərini ruhlandıracaq, həyəcanlandıracaq və əyləndirəcəklər. Onlar qarşıdan gələn aylar ərzində şəhərimizdə və ölkə ərazisində son dərəcə aydın şəkildə görünəcəklər”.

Ceyran qonaqlara Azərbaycanın zəngin irsinə nəzər salmağı təklif etməklə oyunların mədəniyyət elçisi olacaq. Qafqaz dağlarından tutmuş Xəzər dənizinin sahillərinədək Ceyran, qonaqlara ölkə boyu bələdçilik edəcək və onlara Azərbaycanın gözəlliklərini nümayiş etdirəcək. Ceyran ölkədə təbii gözəlliyin, zərifliyin və saflığın simvolu və Azərbaycanda qorunan heyvan növlərindən biridir.

Nar günəşi sevən, Göyçay şəhərində bitən meyvədir. Həyat eşqi və enerji ilə aşıb-daşan Nar, yeni idman növlərində iştirak etməyi sevir və Avropa Oyunları tədbirinə qoşulacaq. Nar Azərbaycan folklorunda birliyi tərənnüm edir və rəngarəng Bakı-2015 brendində əks edilərək artıq şəhərimizdə geniş şəkildə nümayiş etdirilib.

Bakı-2015-in əməliyyatlar üzrə baş direktoru Saymon Kleq deyib: “Bizim simvollar ilk Avropa Oyunları üçün çox əhəmiyyətlidir və onları salamlamağa çox şadıq. Ceyran oyunların və Azərbaycanın zəngin irsinin zərif mədəniyyət elçisi olacaq. Nar oyunların enerjisini, həyəcanını və əyləncəsini təmsil edir və idman sahələrində keçirilən yarışlarda iştirak edəcək”.