İngiltərə futbolunda ağır itki

İngiltərənin sabiq qapıçısı Cimmi Rimmer vəfat edib.

Allsport.az xəbər verir ki, keçmiş qolkiper 78 yaşında dünyasını dəyişib.

Rimmer “Mançester Yunayted”in akademiyasının yetirməsi olub. O, 1968-ci ildə Avropa çempionlar kubokunu qazanan komandanın heyətində yer alıb. “Benfika” ilə final matçında isə ehtiyatda qalıb.

1977-ci ildə “Aston Villa”ya keçən Rimmer bu klubda 6 mövsüm çıxış edib. O, komandanın heyətində çempionatda 229 oyun keçirib. 1981/82 mövsümündə “Aston Villa”nın Avropa çempionlar kubokunu qazandığı yürüşdə bütün matçlarda iştirak edib.

“Bavariya” ilə final görüşünə start heyətdə başlayan qapıçı 9-cu dəqiqədə zədələnərək əvəzlənib. “Aston Villa” həmin oyunda 1:0 hesablı qələbə qazanıb. Bununla da Rimmer ikiqat Avropa çempionlar kuboku qalibi olub.

Cimmi Rimmer karyerası ərzində “Arsenal” və “Suonsi”də də çıxış edib. O, İngiltərə millisində 1 oyun keçirib.