Rihanna ilə bağlı maraqlı təsadüf – FOTO

DÇ-2026-nın finalında İspaniyanın Argentinanı məğlub etməsindən sonra azarkeşlər maraqlı təsadüfə diqqət çəkiblər.

Allsport.az xəbər verir ki, futbolsevərlər Rihannanın stadiondan izlədiyi hər iki dünya çempionatı finalında Argentinanın 0:1 hesabı ilə, əlavə vaxtda buraxdığı qolla məğlub olduğunu xatırladıblar.

İlk belə hadisə 2014-cü ildə Braziliyada keçirilən mundialın finalında yaşanıb. Həmin görüşdə Mario Götzenin əlavə vaxtda vurduğu qol Almaniyaya qələbə qazandırmışdı.

12 il sonra isə Rihanna DÇ-2026-nın finalını izləyərkən Ferran Torresin əlavə vaxtda vurduğu yeganə qol İspaniyaya dünya çempionluğunu gətirib.

Rihanna 2014-cü ildə tribunadan Almaniya millisinə azarkeşlik etmiş, çempionluqdan sonra isə komanda ilə birlikdə qapalı tədbirdə qələbəni qeyd etmişdi.