Tatarıstanın idman naziri AzDBTİA-da olub

Ölkəmizə rəsmi səfərə gələn Tatarıstan respublikasının idman naziri Vladimir Leonov işgüzar görüşlər çərçivəsində Azərbaycan dövlət bədən tərbiyəsi və idman akademiyasında olub. Allsport.az saytı xəbər verir ki, rektor Fuad Hacıyev qonağı elmi-tədris laboratoriyası və multimedia mərkəzi ilə tanış edərək hər iki mərkəzin fəaliyyət istiqaməti barədə məlumat verib.

Qonaqlar akt zalında Avstriyanın “ComplexCore” təşkilatının icraçı direktoru, AzDBTİA-nın “Bədən tərbiyəsi və idmanda reabilitasiya” bakalavr ixtisasının direktoru Roman Yahoda tərəfindən Akademiyanın bakalavriat səviyyəsinin “Bədən tərbiyəsi və idmanda reabilitasiya” ixtisası üzrə təhsil alan 3-cü tədris ilinin tələbələri üçün təhsil proqramına uyğun seçilmiş “Onurğa reabilitasiyası, müdaxilələr” mövzusunda seminarı da izləyiblər. Roman Yahoda qonaqlara proqramın əsas üstünlükləri ilə bağlı məlumat verərək onun ixtisaslı kadrların hazırlanmasındakı rolundan danışıb.

Rusiya nümayəndə heyətinə AzDBTİA-nın fəaliyyətindən bəhs edən film nümayiş olunduqdan sonra tədbir konfrans zalında davam etdirilib. Akademiyanın rektoru Fuad Hacıyev qonaqlara ASAPES-in hazırkı və gələcək fəaliyyət planları haqqında ətraflı məlumat verib.

Qarşılıqlı əməkdaşlıq məsələlərinin müzakirə edildiyi görüşdə Rusiya informasiya və mədəniyyət mərkəzinin rəhbəri İrek Zinnurov, AzDBTİA-nın prorektorları Almaz Ələkbərova və Rizvan Əliyev, həmçinin “İdman tibbi və reabilitasiya” magistr proqramının koordinatoru Zərifə Kamilova da iştirak edib.