Zaur Paşayev «Kutaisi»ni qələbəyə daşıdı

Bu gün millimizin basketbolçusu Zaur Paşayevin çıxış etdiyi «Kutaisi 2010» klubu Gürcüstan Superliqasında növbəti oyununu keçirib.

Allsport.az saytı xəbər verir ki, «ağ-yaşıllar» doğma divarlar arasında «Suxumi»ni qəbul edib. Gərgin keçən görüşdə həmyerlimizin komandası 94:82 hesabı ilə qalib gəlib.

Bu matçda Zaur Paşayev ən yaxşı olub. O, heyətdə ən çox, 23 xal qazanıb; 12 ötürmə verib və 3 götürmə edib. 8 kollektivin yer aldığı çempionatda «Kutaisi» 11 oyundan sonra 19 xalla 1-3-cü yeri bölüşdürür. «Dinamo» digər 2 komanda ilə müqayisədə 1 görüş az keçirib.