Ardıcıl 6-cı səfər qələbəsi

“Qəbələ” Topaz Premyer Liqasının 33-cü turunda “Sumqayıt”la üz-üzə gəldi. Allsport.az xəbər verir ki, səfər oyununda 2:0 hesabı ilə qalib gələn “qırmızı-qaralar” uğurlu seriyalarını bu matçda da davam etdirdi.

Ardıcıl 6-cı səfər qələbəsi

Bu il fevralın 10-da səfərdə “Simurq”a 0:2 hesabı ilə məğlub olan Roman Qriqorçuk həmin oyundan sonra rəqib meydanında xal itirmir. “Qarabağ”ı 1:0, “İnter”i 2:1, AZAL-ı 4:0, “Neftçi”ni 3:1, “Xəzər Lənkəran”ı 1:0 hesabı ilə məğlub edən “Qəbələ” Sumqayıtın eyniadlı komandası ilə matçda ardıcıl 6-cı səfər qələbəsini qazanıb. Bu da klub tarixinin rekordudur.

10 məğlubiyyətsiz oyun

“Qəbələ” fevralın 15-də “Neftçi” ilə ev oyununda (1:3) xal itirdikdən sonra çempionat matçlarında uduzmayıb. Paytaxt təmsilçisi ilə qarşılaşmadan sonraya təsadüf edən seriya müddətində “qırmızı-qaralar” 28 xal qazanıb. 6 səfər oyunu ilə yanaşı, “Xəzər Lənkəran” (3:1), “Sumqayıt” (2:0), “Simurq” (1:0) və “Qarabağ”la (1:1) ev oyunlarında da “Qəbələ” məğlubiyyət acısı yaşamayıb. Komandamızın Premyer Liqadakı ən uzun məğlubiyyətsiz oyunlar seriyası 2011-ci ildə qeydə alınıb. Həmin vaxt “qırmızı-qaralar” 16 matçda heç kimə yenilməyib.

11 qollu oyun

“Simurq”la fevralın 10-da baş tutan qarşılaşmadan sonra Qriqorçukun yetirmələri 11 matçdır meydanı qolsuz tərk etmir. Bu görüşlərdə komandamız 21 dəfə fərqlənib. İndiki seriya klub tarixinin yeni rekordudur. 2006-cı ildən Premyer Liqada çıxış edən “qırmızı-qaralar” indiyədək belə məhsuldarlıq nümayiş etdirməmişdi.

Ən uğurlu mövsüm

Cari mövsümdə son səfər matçını keçirən “Qəbələ” Premyer Liqanı 2 ev oyunu ilə bitirəcək. Rəqib meydanlarında 9-cu qələbəsini qazanan, qol sayını 23-ə, top fərqini 5-ə, xal hesabını 30-a çatdıran “qırmızı-qaralar” mövsümlər üzrə ən yaxşı nəticələrini göstərib. Bu 4 rekordun hamısı ötən mövsümün göstəricilərinin yenilənməsi ilə gerçəkləşib. Həmin 18 səfər oyununda 8 qələbəsi, 21 qolu, 3-ə bərabər top fərqi və 29 xalı olan komandamızın rekordları cəmi 1 ildən sonra yeniləndi.

32-ci qol

Klub tarixinin ən məhsuldar futbolçusu olan Viktor Mendi “Sumqayıt”la oyunda 2-ci qolu vurmaqla “qırmızı-qaralar”ın heyətində 32-ci dəfə fərqlənib. O, “Qəbələ” tarixinin ən məhsuldar oyunçuları siyahısında Dodo (23), Rövşən Əhmədov (20), Kənan Kərimov (18), Yannik Kamanan (17), Deon Bartonu (15) qabaqlayır. Premyer Liqada 28-ci qolunu vuran seneqallı hücumçu Dodo (21), Yannik Kamanan (16), Deon Bartonla (15) fərqi artırıb.