“Qarabağ”ın sabiq futbolçusu 4-cü divizionda

“Qarabağ” və “Neftçi”nin sabiq futbolçusu Donald Gerye karyerasını Polşanın “Veçista” komandasında davam etdirəcək.

Allsport.az xəbər verir ki, haitili yarımmüdafiəçi Krakov təmsilçisi ilə cari mövsümün sonunadək müqavilə imzalayıb. Sözləşmənin müddəti yayda daha 1 il uzadıla bilər.

32 yaşlı oyunçu 4-cü liqa klubunda 96 nömrəli forma altında çıxış edəcək.

Donald Gerye 2017 – 2019-cu illərdə də “Qarabağ”ın şərəfini qoruduqdan sonra “Neftçi”yə keçib. O, 2020/2021 mövsümünün əvvəlində Ağdam klubuna qayıdıb. Futbolçunun son klubu Kipr “Apollon”u olub.