Serbiya Azərbaycan üçün əlçatmaza çevrilmək üzrədir

UEFA Çempionlar Liqasının üçüncü təsnifat mərhələsinin ötən gecə baş tutan cavab oyunları Azərbaycanın UEFA reytinqindəki mövqeyinə təsir göstərməyib. Allsport.az xəbər verir ki, ölkəmiz bu siyahıda əvvəlki mövqeyində qalıb.

Qeyd edək ki, Azərbaycanı qitənin ən nüfuzlu klub turnirində bu il də son çempion “Qarabağ” təmsil edirdi. Ağdam klubu ötən gecə doğma meydanda Şotlandiya çempionu “Seltik”lə qarşılaşdı və qolsuz bərabərliyə razılaşdı. İlk oyunda minimal hesabla uduzduğuna görə, təmsilçimiz ÇL-də mübarizəni dayandırmaq məcburiyyətində qaldı. Amma cavab görüşündəki heç-heçə ilə ağdamlılar Azərbaycanın UEFA reytinqindəki xal ehtiyatını 0.125 balla zənginləşdirdilər.

Hazırda UEFA reytinqində 54 ölkə arasında 29-cu pillədəyik. Azərbaycanın hesabında 12.500 reytinq xalı var ki, onun da 2.000 xalı cari mövsümdə qazanılıb (“İnter” – 0.625, “Qəbələ” – 0.625, “Qarabağ” – 0.500, “Neftçi” – 0.250).

Azərbaycandan öndə qərarlaşan Serbiya isə təmsilçisi “Partizan”ın müvafiq turnirdəki Rumıniya “Styaua”sına qarşı cavab oyunundakı qələbəsi sayəsində xal ehtiyatını yaxşılaşdırıb – 12.875 (cari mövsümdə 2.500)

Onu da əlavə edək ki, klublarımızın təsnifat mərhələsindəki istənilən qələbəsi Azərbaycana 0.250 reytinq xalı qazandırır. Heç-heçə isə sadəcə, 0.125 xal verir. Qrup mərhələsində heç-heçə 0.250, qələbə 0.500 xalla qiymətləndirilir.