Elcan Hacıyev: “Debütdə, özü də Vətəndə medal qazanmaq 2-qat fərəhlidir”

“İlk dəfə böyüklər arasında çıxış edirdim. Debütdə, özü də Vətəndə medal qazanmaq 2-qat fərəhlidir. Yığmanın yeni məşqçilər heyətinə təşəkkür edirəm”.

Bunu allsport.az saytına açıqlamasında Bakıda cüdo üzrə “Böyük dəbilqə”də 81 kq-da 3-cü yer tutan Elcan Hacıyev dedi. 19 yaşlı idmançı həlledici görüşdə komanda yoldaşı Hasil Cəfərovun səhv etdiyini söylədi:

“Finalı hədəfləmişdim, olmadı. Hər halda, bürünc medal da yaxşı nəticədir. 3-cü yer üçün ağılla güləşdim, rəqibimin səhvindən istifadə etdim. O tutmağa imkan verirdi və mən də bir dəfə bu fürsətdən yararlandım”.