“İnter” 201 gündən sonra məğlubiyyətlə üzləşdi

Bakının “İnter” klubunun məğlubiyyətsiz oyunlar seriyası qırılıb. Allsport.az xəbər verir ki, Topaz Premyer Liqasında ardıcıl 18 qarşılaşmada xalsız qalmayan paytaxt təmsilçisi 26-cı turun “Qəbələ” ilə ev matçında meydanı məğlub tərk edib – 1:2.

Sonuncu dəfə 4-cü turun “Xəzər Lənkəran”la görüşündə uduzan Kaxaber Sxadadzenin komandası “Xəzər Lənkəran”la səfər matçından (0:1) sonra heç kimə 3 xal verməmişdi. “İnter” 2014-cü il avqustun 29-da aldığı məğlubiyyətdən 201 gün sonra meydanı üzgün tərk edib.

Paytaxt təmsilçisi mövsümdə ilk dəfə öz meydanında xalsız qalıb. Əvvəlki 11 oyunda uduzmayan bakılılar sonuncu dəfə ötən mövsüm – 2014-cü il martın 16-da öz meydanında məğlubiyyətə üzülmüşdü. 367 gün əvvəl “Qarabağ”dan 3 cavabsız qol buraxan “İnter” son 16 ev oyununda 12 qələbə qazanıb, 4 heç-heçə edib.