Forgot Password New Account
Gəzən xəbər

Qalib boksçumuz: Albert Səlimovun məğlub olmağı məni çox təəssüfləndirdi

Boks
13 avqust 2016 / 12:58 Baxış sayı: 1298

Azərbaycan boksçusu Kamran Şahsuvarlı (75 kq) Rio-2016-da 1/8 finalda rusiyalı Artyom Çebotaryovu məğlub edərək, növbəti mərhələyə çıxıb. Allsport.az saytı idman.com.az-a istinadən xəbər verir ki, qələbədən dərhal sonra həmyerlimizin bu döyüş və qarşıdakı qazaxıstanlı dünya çempionu Janibek Alimxanlı ilə görüşü barədə fikrini öyrəndik:

– Döyüş barədə nə deyə bilərsən?
– Döyüşdən qabaq çox həyəcanlı idim. Özümü toplayıb rinqə hazır oldum. Çox sağolsun məşqçılər, məni döyüşə yaxşı köklədilər və qələbə qazandım.

– Növbəti döyüş elə bir döyüşdür ki, onda qalib gəlsən, ən azından medalın olacaq. Həmin döyüşdə də rəqibin qazaxıstanlı idmançıdır. Həmin rəqibi tanıyırsanmı?
– Bəli, tanıyıram. Bildiyiniz kimi, mən əvvəl Qazaxıstanda qalmışam. Qazaxıstanın gənclər çempionatında bir dəfə ona məğlub olmuşam. İndi, inşallah, özümü toplayacağam və çalışacağam yaxşı döyüşüm.

– İndi ondan qisas almağın vaxtıdır. Özünü bu döyüşə hazır hiss edirsənmi?
– İki döyüş keçmişəm. Artıq o qədər də həyəcan olmayacaq. Bilirəm ki, indi ən vacib döyüş olacaq.

– Səndən əvvəl digər idmançımız Albert Səlimovun məğlubiyyəti sənə psixoloji təsir etmədi ki?
– Biz Albertlə bir otaqda qalırıq. Bir-birimizi çox yaxşı dəstəkləyirik. Onun məğlub olmağı da məni çox təəssüfləndirdi.

– İndi onun da əvəzinə sən medal qazanmağa çalışmalısan. Sənə uğurlar arzulayırıq. Hamı səndən medal gözləyir.
– Çox sağolun.

Qabil MEHDİYEV, Rio de Janeyro

Həmin kateqoriyadan