Dünya çempionu Maqnus Karlsen Bakıda

Şahmat üzrə dünya çempionu Maqnus Karlsen Bakıya gəlib. Allsport.az saytı xəbər verir ki, hava limanında qonağı “ShamkirChess-2015” turnirinin təşkilatçısı “Synergy Group”un rəsmiləri qarşılayıb. Məşhur qrossmeyster bu gün səhər Gəncəyə, orada isə yarışın keçiriləcəyi Şəmkirə yola düşüb.

Mərhum şahmatçımız Vüqar Həşimovun xatirəsinə həsr olunan ShamkirChess2015 turniri aprelin 16-da start götürəcək. Ötən il keçirilən ilk yarışın qalibi norveçli Maqnus Karlsen olub.

Synergy Group ASC-nin təşkilatçılığı ilə təşkil olunan superturnirdə hazırkı dünya çempionu Maqnus Karlsen, sabiq dünya çempionları Vişvanatan Anand, Vladimir Kramnik eləcə də Fabiano Karuana, Aniş Giri, Uesli So, Maksim Vaşye-Lagrav, Maykl Adams, Şəhriyar Məmmədyarov və Rauf Məmmədov iştirak edəcək.