“Vüqar Həşimovun xatirə yarışı Azərbaycanda şahmatın inkişafına dəstək olur”

Vüqar Həşimovun xatirəsinə “ShamkirChess-2017” superturnirinin son qalibi Şəhriyar Məmmədyarov aprelin 20-də start götürəcək yeni, sayca 4-cü rəqabət haqqında fikrini bildirib. Allsport.az saytı yarışın mətbuat xidmətinə istinadən xəbər verir ki, qrossmeysterimiz bu mübarizənin onun karyerasında özünəməxsus yer tutduğunu söyləyib:

“Şəmkir turniri dostumuz, Azərbaycanın fəxri Vüqar Həşimovun xatirəsinə həsr olunub. Uzun illər Vüqarla komanda yoldaşı olmuşuq. Hər zaman bir-birimizə kömək etmişik. Buna görə həmişə Şəmkirə böyük həvəslə yollanıram. Bu il həmin tarixlərdə keçiriləcək başqa turnirdən dəvət almışdım. Bununla belə Şəmkirdə iştirak edəcəyim barədə qərar qəbul etdim.

Üstəlik yarışın son qalibi kimi bu il də yüksək yerlər uğrunda mübarizə aparmaq fikrindəyəm. İştirakçıların siyahısında demək olar ki, zəif şahmatçı yoxdur. Bütün şahmatçılar FİDE reytinqində yüksək yerlərdə qərarlaşıb. Dünya çempionu Maqnus Karlsenin olmaması mübarizəni asanlaşdırmır. Əksinə onun yoxluğunda iddialıların sayı artır.

Yarışın son qalibi kimi bu il də qələbə uğrunda mübarizə aparacam. Bunun asan olmayacağını başa düşürəm. Dünya çempionları Vladimir Kramnik, Veselin Topalov, dünya çempionluğuna namizəd olmuş Sergey Karyakin kimi şahmatçıların yarışdığı turnirdə rahat nəfəs almaq mümkün deyil.
Şahmatçılar adından Təşkilat Komitəsinə, “Synergy Group”-a təşəkkür etmək istərdim. Hazırda dünyada yüksək kateqoriyalı şahmat yarışları azlıq təşkil edir.

Bununla belə, təşkilatçılar Şəmkir turnirinin ənənəvi olmasına nail olub. Bununla onlar Vüqar Həşimovun adına böyük ehtiramını nümayiş etdirir, eyni zamanda, Azərbaycanda şahmatın inkişafına dəstək olur. Mən həmişə Şəmkirə böyük sevinclə yola düşürəm. Bu il də şahmat həvəskarlarının çox maraqlı partiyalar izləyəcəyinə əminəm”.

Həmin kateqoriyadan