Şahmatçılarımız Avropa çempionatında liderdilər

Rumıniyanın Mamaya şəhərində yeniyetmə oğlan və qız şahmatçılar arasında Avropa çempionatında 7-ci turun oyunları keçirilib.

Allsport.az xəbər verir ki, 12 yaşadək idmançıların yarışında təmsilçimiz Əhməd Xaqan, ispaniyalı lider Marin Pauya qalib gələrək birinci pilləyə yüksəlib.

14 yaşadək iştirakçıların mübarizəsində Rüstəm Rüstəmov digər ispaniyalı Daniyel Tabuenkanı məğlub edib. O, bu qələbədən sonra 6 xalla liderlər sırasındadır. 8 yaşadək qızların yarışında Mehriban Əhmədli 7-ci turda fransalı Kamil Bilot Lauleni məğlub edib.

U-18 yaş qrupunda ağ fiqurlarla oynayan Xəzər Babazadə 7-ci turda norveçli Elham Abdrlaufu üstələyib. Hesabında 6 xal olan təmsilçimiz bu kateqoriyada lider mövqedədir.

Ayan Allahverdiyeva, Rumıniya şahmatçısı Aleksiya Teodora Puini üstələyib.

Beləliklə, 7 turdan sonra müxtəlif yaş kateqoriyalarında Əhməd Xaqan, Xəzər Babazadə, Mehriban Əhmədli, Ayan Allahverdiyeva birinci, Rüstəm Rüstəmov ikinci, Məhəmməd Kazımzadə, Əsnad Baxşızadə üçüncü pillədə qərarlaşıblar.

Turnir sentyabrın 14-də başa çatacaq.