Son anda finala qoşulan Məhəmmədin əsəblərinin möhkəmliyi çempionluqda ona kömək oldu”

Azərbaycan şahmat federasiyasının prezidenti Mahir Məmmədov, Naxçıvanda kişilər arasında Azərbaycan çempionatının nəticələri barədə danışıb. Allsport.az saytı xəbər verir ki, o, yarışın qalibi Məhəmməd Muradlının yüksək oyun nümayiş etdirdiyini deyib:

“İlk növbədə Azərbaycan çempionatının qalibini və mükafatçıları təbrik etmək istərdim. Çempionatın qalibi Məhəmməd Muradlı çox yaxşı mübarizə göstərdi. İlk mərhələdə sıralamada 4-cü olmaqla son anda finala qoşulan Məhəmmədin əsəblərinin möhkəm olması çempionluqda ona kömək oldu. Final mərhələsində bütün oyunlarının gedişatına nəzarət etməyi bacardı və yekunda layiqli olaraq qızıl medal qazandı. Məhəmməd Muradlının istedadlı şahmatçı olması bizə məlumdu. O hələ 2019-cu ildə ilk dəfə Azərbaycan çempionatında qalib gələndə diqqəti özünə cəlb etdi. Buna görə Məhəmmədin ikinci dəfə çempion olması bizim üçün sürpriz hadisə olmadı.

Çempionatın nəticələrinə gəlincə fikrimcə Aydın Süleymanlı yarımfinalda daha çox uğur qazana bilərdi. Hər iki partiyada müəyyən üstünlüyə nail olsa da sonda istədiyi nəticəni qazana bilmədi. Vaxtı düzgün paylaşdıra bilməməsi və müəyyən qədər təcrübəsinin az olması sonda ona çətinlik yaratdı. Bu amillər Aydına finala çıxmağa imkan vermədi.

Gümüş medalçı Misrəddin İskəndərovun gözəl oyununu qeyd etməliyəm. Xüsusilə ilk mərhələdə yüksək hazırlıq nümayiş etdirməsi bizi sevindirdi. Ötən ilin çempionu Vasif Durarbəyli yaxşı mübarizə göstərdi və sonda bürünc medala layiq görüldü.

Milli komandanın üzvü Eltac Səfərlinin final mərhələsindən kənarda qalması gözlənilməz oldu. Bu bir daha göstərdi ki, reytinq şahmatda nəticəni müəyyənləşdirmir. Çempion olmaq üçün yarış günü rəqibə qarşı ən yaxşı oyununu göstərməlisən və qalib gəlməyi bacarmalısan. Əfsuslar olsun bu dəfə Eltac Səfərlidə alınmadı. Bununla belə onun yüksək səviyyəli şahmatçı olması hamıya məlumdur. Eltacın gələcəkdə böyük qələbələr qazanacağına inanırıq”.

Mahir Məmmədov, eyni zamanda yarışın favoriti hesab edilən beynəlxalq qrossmeyster Nicat Abbasovun çempionatda iştirak etməməsinin səbəbini açıqladı: “Təəssüflər olsun çempionatda iştirak etmək istəyən Nicat Abbasov koronavirusa yoluxması səbəbindən mübarizədən kənarda qaldı. Nicat çempionatda iştirak etsəydi yarış daha maraqlı olacaqdı”.

Sonda federasiya rəhbəri millinin komandalar arasında dünya çempionatında güclü heyətlə çıxış edəcəyini söylədi: “Apreldə İsraildə kişi şahmatçılardan ibarət komandalar arasında dünya çempionatı keçiriləcək. Azərbaycan yığması da mötəbər yarışa dəvət alıb. Bilirsiniz ki, ötən il qadınlardan ibarət yığmamız dünya çempionatında mübarizə apardı. Hərçənd komandamızın çıxışı o qədər uğurlu olmadı. Yığmamız qrupdan çıxmağı bacarsa da, ilk pley-off görüşündə məğlub oldu. İsraildəki yarışda ən güclü heyətlə təmsil olunmağı planlaşdırırıq. Yaxın günlərdə heyət və kapitan barədə məlumat veriləcək”.