FOTO

12-ci beynəlxalq uşaq şahmat turniri başa çatıb

“Landmark” mehmanxanasında “Gənclik” Şahmat Klubunun təşkilatçılığı ilə 12-ci beynəlxalq uşaq şahmat turniri keçirilib. Allsport.az saytı xəbər verir ki,  14 yaşlıların mübarizəsində Azərbaycanla yanaşı Gürcüstan və Fransanı təmsil edən idmançılar da iştirak ediblər. Turnir 2 qrup üzrə – “A” və “B” qruplarından ibarət olub.

40 nəfərin iştirak etdiyi “A” qrupunda yarışlar 7 tur üzrə İsveçrə sistemi üzrə, 12 idamançının qatıldığı “B” qrupunda yarışlar dairəvi sistem üzrə keçirilmişdir. Yarışlar beynəlxalq dərəcəli hakim Nurəli Məmmədzadə tərəfindən idarə olunmuşdur. “A” qrupunda ilk 3 yeri müvafiq olaraq Andrey Mustafin, Nikolozi Kaçarava və Məhəmməd Muradlı tutublar.

Bağlanış mərasimində “Gənclik” Şahmat Klubunun sədri Gennadi Gelman, “Fransız İnstitutu” Mədəniyyət Mərkəzi tərəfindən Frankofoniya həftəsi çərçivəsində təşkil olunduğunu tədbir iştirakçılarının nəzərinə çatdırıb. Sonra Fransanın Azərbaycandakı fövqəladə və səlahiyyətli səfiri Paskal Mönye, Bakı Şəhər Gənclər və İdman Baş İdarəsinin baş məsləhətçisi, paytaxtın şahmat idman növü üzrə koordinator-kuratoru Salman Əbdülov, Fransa səfirliyinin əməkdaşları və digər rəsmi şəxslər çıxış edərək, yarış iştirakçılarına təşəkkürlərini bildirib.

Şahmatın inkişafında xüsusilə uşaqlar arasında keçirilən bu tipli yarışların böyük rol oynadığını deyıb, qalibləri təbrik etmişlər. Çıxışlardan sonra “A” və “B” qruplarında fərqlənən şahmatçılar, həmçinin yarışlarda ter tutan idmançılar diplomlar və qiymətli xatirə hədiyyələri ilə təltif olunublar.