Ağırlıqqaldıranımız dünya kubokunda 2-ci yer tutub

Peruda yeniyetmə ağırlıqqaldıranların dünya kuboku keçirilir. Allsport.az saytı xəbər verir ki, yarışda 61 ölkədən 399 (181 qız və 218 oğlan) nəfər mübarizəsi aparır. Onların arasında Azərbaycan yığmasının üzvləri də var. Bunlar Elşən Məmmədov (61 kq), Murad Əliyev (67 kq), Sənan Sahibov (73 kq) və Əli Şükürlüdür (102 kq).

Kubok qeyri-ənənəvi qaydada təşkil edilir. Dünyada tüğyan edən koronavirus pandemiyası səbəbindən idmançıların bir araya gələrək eyni məkanda yarışması mümkün deyil. Bu səbəbdən beynəlxalq ağırlıqqaldırma federasiyası tərəfindən alternativ variant olaraq onlayn yarış keçirilməsi qərarı qəbul edilib. Kubokda iştirakı təsdiqlənən ölkələrin idmançılarının hər biri öz ölkəsində (məkan seçimi sərbəstdir) təyin olunan yarış vaxtında “Zoom” proqramı vasitəsilə qoşulur, hər biri öz yanaşmasını qaydalara uyğun və sıralama ilə yerinə yetirir.

Artıq 2 atletimiz körpücük üzərinə çıxıb. Elşən Məmmədov toplam 200 kq (90+110) nəticə ilə “B” qrupunda 9-cu yeri tutub. Murad Əliyev birdən qaldırmada 120 kq, təkanla 139 kq-ı başı üzərinə qaldıra bilib. Toplam 259 kq-la gümüş medala sahib çıxıb.

Qeyd edək ki, dünya kuboku noyabrın 18-də başa çatacaq.