Alrosa kubokunda sərbəst və qadın millimiz 2-ci, “klassik” güləşçilərimiz 3-cü oldu

Moskvada güləş üzrə qitələrarası Alrosa kuboku beynəlxalq turniri keçirilib. Allsport.az saytı xəbər verir ki, komanda yarışında 23 yaşadək idmançılar 6 çəki dərəcəsində mübarizə aparıblar.

Sərbəst güləşdə millimiz İran və Özbəkistanla “B” yarımqrupunda yer alıb. Adı 2-ci çəkilən yığmanı 5:1 üstələyən pəhləvanlarımız, İran komandası ilə görüşü 3:3 hesablı bərabərliklə tamamlayıb. Qrup lideri kimi finala yüksələn millimiz həlledici görüşdə digər qrupun 1-cisi Rusiya ilə qarşılaşıb. Bu görüş də 3:3 hesablı bərabərliklə tamamlanıb. Xalların keyfiyyətinə görə ev sahibləri qalib olub.

Qadın güləşçilərin yarışında cəmi 4 komanda (Azərbaycan, Rusiya, Türkiyə və Özbəkistan) olduğundan mübarizə dairəvi sistem üzrə aparılıb. Millimiz ilk görüşdə Rusiya komandasına 2:4 hesabı ilə məğlub olsa da Türkiyə və Özbəkistanla görüşdən 5:1 hesablı qələbə ilə ayrılıb. Dairəvi mübarizə sisteminin ən yaxşı iki komandası kimi Azərbaycan və Rusiya yığmaları finalda yenidən qarşılaşıb. Görüş 3:3 hesabı ilə başa çatsa da xalların keyfiyyətinə görə 17:9 öndə olan Rusiya yığması qalib olub. Qadın güləşçilərimiz turniri 2-ci sırada başa vurub.

Yunan-Roma güləşində yığmamız ilk olaraq Belarus komandası ilə qarşılaşıb. 2:4 hesabı ilə uduzan yığmamız digər qrupun ikincisi olan İran yığması ilə qarşılaşıb. Ümumi hesab 3:3 olsa da xalların keyfiyyətinə görə 13:10 hesabı ilə qalib gələn güləşçilərimiz turnirin bürünc mükafatına layiq görülüb.

Görüşlərin idarə edilməsində beynəlxalq dərəcəli hakim Vaqif Zeynallı ölkəmizi təmsil edib.