Azad Rəhimov Strasburq səfərində nələri müzakirə edib?

Strasburqda səfərdə olan gənclər və idman naziri Azad Rəhimov ilk olaraq Avropa Şurasının mənzil-qərargahında təşkilatın baş katibinin müavini xanım Qabriella Battaini-Draqoni ilə görüşüb. Allsport.az saytı xəbər verir ki, toplantıda 2 tərəf arasında gənclər və idman sahəsində formalaşmış geniş əməkdaşlıq münasibətlərinə nəzər salınıb və bu münasibətlərin daha da inkişafı istimatətində gündəmində dayanan müxtəlif mövzu və layihələr ətrafında fikir mübadiləsi aparılıb. Eyni zamanda, qarşıdan gələn dövrdə Azərbaycanın Avropa Şurası çərçivəsində gənclər və idman sahələri üzrə planlaşdırılan gələcək fəaliyyətinin yeni istiqamətləri də müzakirə edilib.

Bununla yanaşı, səfəri çərçivəsində nazir Azad Rəhimov Azərbaycan Respublikasının Avropa Şurası yanında daimi nümayəndəliyi tərəfindən təşkil edilən, Ümumdünya Antidopinq Agentliyinin icraiyyə komitəsinin Avropadan olan üzvü mövqeyinə Azərbaycan Milli Antidopinq Agentliyinin rəhbəri Şəfəq Hüseynlinin namizədliyinin təqdimatı mərasiminə də qatılıb. Əsasən üzv dövlətlər üçün keçirilən bu tədbirdə daimi nümayəndə Fəxrəddin İsmayılovun açılış qeydlərinin ardınca nazir Azad Rəhimov ölkəmizdə idmanın inkişafı sahəsində işlər haqqında məlumat verib və əldə olunmuş nailiyyətləri iştirakçıların diqqətinə çatdırıb.

Nazir Respublikamızda antidopinq sahəsinə yetirilən diqqəti vurğulayıb, AMADA-nın dopinqlə mübarizə sahəsində qazandığı uğurlardan bəhs edib və üzv dövlətləri qarşıdan gələn günlərdə keçiriləcək seçkilərdə Azərbaycan namizədinə dəstək verməyə çağırıb. Öz çıxışında Şəfəq Hüseynli WADA-nın icraçı komitəsinə namizəd kimi irəli sürdüyü platforma barədə maraqlı təqdimatla çıxış edib və qlobal səviyyədə dopinq ilə effektiv mübarizə ilə bağlı düşüncələrini bölüşüb.

Həmin kateqoriyadan