Güləş yığmalarımız reytinq yarışlarına Türkiyədə hazırlaşır

Güləş üzrə milli komandalarımız reytinq xarakterli beynəlxalq yarışlara hazırlıqları davam etdirir. Allsport.az saytı xəbər verir ki, bu dəfə təlim-məşq toplanışı Türkiyədə keçir. Bu məqsədlə hər 3 növ üzrə yığmamızın üzvləri İstanbuldadır.

Ayın əvvəlindən qardaş ölkəyə yollanan yunan-Romaçılar iştirak etdiyi hazırlıqda Hindistan, Qırğızıstan, Gürcüstan, Bolqarıstan, Estoniya, Litva, Ukrayna və Moldova komandaları da var. Milli 20-22 iyulda Vəhbi Əmrənin xatirə turnirdə qüvvələrini sınayacaq.

Digər 2 komandamız ötən həftədən etibarən İstanbulda təlim-məşq toplanışına başlayıb. “Sərbəstlər” Hindistan, Belarus, Ukrayna və Tatarıstan komandaları ilə birgə toplanışdadır. Qadın güləşçilərin təlim-məşqində Türkiyə və Hindistan komandaları da iştirak edirlər.

Təlim-məşq toplanışı başa çatdıqdan sonra güləşçilərimiz 27-29 iyul tarixlərində Türkiyənin İstanbul şəhərində keçiriləcək Yaşar Doğunun xatirəsinə həsr olunan  reytinq xarakterli beynəlxalq turnirdə sınaqdan keçiriləcək.