“Hazırlığımız yüksək səviyyədə davam edir”

Qadın voleybol millisinin qarşıdakı məsul sınaqlara hazırlığı davam edir. Allsport.az saytı xəbər verir ki, komandanın hücumçusu Odina Əliyeva durumu belə dəyərləndirib:

“İslamiadaya və Avropa çempionatının təsnifatına hazırlığımız yüksək səviyyədə davam edir. İyulun 1-dən etibarən mən də millimizin məşqlərinə qoşulmuşam. Məşqlərə başladığım gündən etibarən çalışıram ki, tam formamı yığım. Komandamızda yüksək əhval-ruhiyyə var.

Hazırda Sloveniyada təlim-məşqlərimiz davam edir və burada yerli yığma komanda ilə bir neçə yoxlama matçı da keçirəcəyik. Bu ayın sonunadək Mariborda hazırlığımız davam edəcək. Ardınca Bakıya qayıdacaq və avqustun 5-də Türkiyəyə yola düşəcəyik.

İnanıram ki, İslam həmrəyliyi oyunlarında və Avropa çempionatının təsnifat mərhələsində uğurlu çıxış edəcək və qarşımıza qoyulan məqsədlərə çatacağıq”.