İdarə heyəti bir illik fəaliyyəti müzakirə edib

Azərbaycan idman jurnalistləri federasiyası idarə heyətinin növbəti toplantısı olub. Allsport.az saytı xəbər verir ki, karantin qaydalarına riayət edilməklə, təşkilatın 2021-ci ildə keçirilən ilk iclası həm də AİJF-nin fəaliyyətinin ilk ildönümü ilə eyni ərəfəyə təsadüf edib. Qurumun təqdimatı 2020-ci il yanvarın 10-da keçirilmişdi.

Yığıncaqda əsasən, federasiyanın bir il ərzindəki fəaliyyətinə nəzər salınıb, hesabat müzakirə edilib. Qeyd edilib ki, pandemiya ilə müşaiyət olunan 2020-ci il ərzində digər qurumlar kimi, AİJF də daha çox onlayn rejimdə fəaliyyət göstərməli olub. Ümumilikdə, idarə heyəti üzvləri pandemiya şəraitində olmasına baxmayaraq, qurumun illik fəaliyyətini qənaətbəxş hesab ediblər.

İclasda təşkilatın fevralın 20-də idman jurnalistlərinin növbəti toplantısını keçirmək qərar alınıb. 2021-ci il tədbirlər planı müzakirə edilib və təsdiqi növbəti iclasa saxlanılıb. AİJF-nin mükafatlarına yeni nominasiyalar müzakirə edilərək təsdiqlənib.
Həmçinin, yanvar ayından başlayaraq, gənclər və idman nazirliyi ilə birgə əməkdaşlıq çərçivəsində, şəhid idmançı ailələrinin ziyarət edilməsi də qərara alınıb.