Məşqçilər heyətində köklü dəyişiklik

Olimpiya Güləş Mərkəzində milli komandalarının məşqçilər korpusu ilə görüş keçirilib. Allsport.az saytı xəbər verir ki, AGF-in 1-ci vitse-prezidenti Namiq Əliyevin iştirak etdiyi görüşdə, məşqçilər heyətində edilən dəyişikliklər də açıqlanıb. Baş katib Əjdər Cəfərov son islahatların yığma komandaların daha gücləndirilməsinə xidmət edəcəyini bildirib:

“Azərbaycan Güləş Federasiyasının prezidenti cənab Fazil Məmmədovun əmrinə əsasən, yığma komandaların məşqçilər korpusunda dəyişikliklər edildi. İnanırıq ki, dəyişiklik yığma komandaların daha da gücləndirilməsi və güləşçilərin qarşıdan gələn yarışlara daha yaxşı hazırlaşmalarına xidmət edəcək.

Qarşıda bizi ciddi sınaqlar gözləyir. Çalışacağıq ki, 2015-ci ildə paytaxtımızda keçiriləcək ilk Avropa Oyunları, ardınca Las Veqasda Olimpiya Oyunlarına lisenziya xarakterli Dünya çempionatı və nəhayət, 2016-cı il Braziliyada Yay Olimpiya Oyunları kimi mötəbər yarışlarda güləşçilərimiz maksimum sayda yüksək əyarlı medallar qazanmaqla yeni tarix yazsın və xalqımızı sevindirsinlər.

Bilirik ki, ölkə prezidenti, Milli Olimpiya Komitəsinin prezidenti cənab İlham Əliyevin güləşə və güləşçilərə xüsusi diqqət və qayğısı var. Federasiya tərəfindən də hər bir şərait yaradılıb. Etimadı doğrultmaq üçün var-gücümüzlə çalışacağıq”.

Edilmiş dəyişikliklərdən sonra məşqçilər korpusunun yeni heyəti aşağıdakı kimidir:

Yunan-Roma güləşi

Ustalar: baş məşqçi – Cəmşid Xeyrabadi, böyük məşqçi – Nurəddin Rəcəbov, məşqçilər – Akif Əliyev, Eyub Azmudeh
Gənclər: böyük məşqçi – Şaban Donad, məşqçilər – Zöhrab Abbasov, Turac Hüseynov
Yeniyetmələr: böyük məşqçi – Bəhram Mürvətov, məşqçilər – İslam Cəfərov, Fuad Alıyev
Kiçik yaşlı yeniyetmələr: məşqçilər – İlqar Abdulov, Vüqar Aslanov, Rasim Ağayev

Sərbəst güləş

Ustalar: baş məşqçi – Saypulla Absəidov, böyük məşqçi – Firdovsi Umudov, məşqçi – David Kurtsiya
Gənclər: böyük məşqçi – Əsgərxan Novruzov, məşqçi – Rövşən Hacıyev
Yeniyetmələr: böyük məşqçi – Nazim Əlicanov, məşqçilər – Vahid Məmmədov, Rövşən Umudov
Kiçik yaşlı yeniyetmələr: məşqçilər – Mehman Nəcəfov, Elşad Allahverdiyev

Qadınlar

Ustalar: baş məşqçi – Semyon Çteryov, böyük məşqçi – Konstantin Konorev, məşqçi – Arif Fərmanov
Gənclər: böyük məşqçi – Yaqub Məmmədov, məşqçi – Aslan Ağayev
Yeniyetmələr: böyük məşqçi – Həsrət Məmmədyarov, məşqçi – İsaməddin Hüseynov