Məşqçilik karyerasında 500-cü oyun

Rusiyalı mütəxəssis Stanislav Çerçesov məşqçilik karyerasında yubiley oyununu keçirib.

Allsport.az xəbər verir ki, “Rubin”la qarşılaşma 63 yaşlı çalışdırıcının baş məşqçi kimi 500-cü oyunu olub.

Son bir ildə “Axmat”ı çalışdıran Çerçesov baş məşqçi kimi ilk oyununa 2004-cü ilin martında Avstriyanın “Kufştayn” klubunda çıxıb.

Mütəxəssis daha sonra “Vakker”, “Spartak”, “Jemçujina”, “Terek”, “Amkar”, Moskva “Dinamo”su, “Legiya”, Macarıstanın “Ferentsvaroş” klublarında, həmçinin Rusiya və Qazaxıstan milli komandalarında işləyib.

Keçmiş qapıçı məşqçi kimi Polşa və Macarıstan çempionatlarının, eləcə də bu ölkələrin kuboklarının qalibi olub. O, həmçinin Rusiya premyer liqasında gümüş medal qazanıb.