Olimpiya və dünya çempionu: “Ermənistanı belə qeyri-insani addımlardan çəkindirməyə çağırıram”

Sentyabrın 27-də cəbhədə atəşkəs yenidən pozulub. Allsport.az saytı xəbər verir ki, Ermənistan qoşunlarının hücumlarını dəf edən Azərbaycan ordusunun uğurlu əməliyyatları nəticəsində işğal altında olan torpaqlarımızın bir qismi azad edilib. Ancaq düşmənin silahlı qüvvələri cəbhə bölgəsində yaşayan mülki əhalini hədəf alır və yaşayış sahələrinə atəş açır. Bununla əlaqədar olaraq, sərbəst güləş üzrə olimpiya, dünya və Avropa çempionumuz Şərif Şərifov münasibətini bildirərək, qarşı tərəfin qeyri-adekvat hücumlarına öz etirazını bildirib:

“Bildiyiniz kimi, 30 ilə yaxındır ki, Ermənistan Azərbaycan torpaqlarını işğal edib. Nəticədə 1 milyondan artıq azərbaycanlı qaçqın və məcburi köçkünə çevrilib. Bu müddət ərzində aparılan sülh danışıqları heç bir fayda verməyib. İşğalçılıq siyasətini davam etdirən Ermənistan sentyabrın 27-də növbəti dəfə atəşkəsi pozub.

Ən pisi də odur ki, onlar dinc sakinləri hədəf alır. Nəticədə ölən və yaralananlar var. Həyatını dəyişənlər arasında uşaqların da olması dəhşətdir. Mən bir olimpiya çempionu kimi dünya ictimaiyyətini Ermənistanı belə qeyri-insani addımlardan çəkindirməyə çağırıram. İnanıram ki, tez bir zamanda Azərbaycan ordusu bütün işğal olunmuş torpaqları azad edəcək”.

Şərif Şərifovin hazırda şəxsi məşqçisi AGF-in vitse-prezidenti Firdovsu Umudovdur.

Həmin kateqoriyadan