Pərvin Piriyevin rəhbərliyi ilə texniki və hakimlər komitəsinin iclası keçirilib. Quruma kim yeni üzv olub?

Azərbaycan güləş federasiyasının texniki və hakimlər komitəsinin növbəti iclası keçirilib. Allsport.az saytı xəbər verir ki, AGF-nin baş katibi Pərvin Piriyevin rəhbərliyi ilə toplantıda idman şöbəsinin müdiri Kamran Quliyev və yunan-Roma güləşi üzrə milli komandanın böyük məşqçisi Nurəddin Rəcəbov texniki və hakimlər komitəsinin tərkibinə üzv seçilib.

Görüş zamanı komitənin fəaliyyəti ilə bağlı müxtəlif məsələlər ətrafında geniş fikir mübadiləsi aparılıb. Müzakirələrdə hakimlərin və məşqçilərin bilik və bacarıqlarının artırılması məqsədilə təlim və seminarların təşkili, azyaşlı və yeniyetmə güləşçilər arasında liqa yarışlarının keçirilməsi, həmçinin maddi-texniki bazanın daha da gücləndirilməsi istiqamətində görüləcək işlər nəzərdən keçirilib.

İclasda səsləndirilən təkliflər dəyərləndirilib, Komitənin qarşıdakı dövr üçün fəaliyyət istiqamətləri müəyyənləşdirilib və gələcək iş planının hazırlanması ilə bağlı müvafiq qərarlar qəbul olunub.

Görüşdə hakimlik institutunun inkişafı, yarışların keyfiyyətinin artırılması və güləşin bütün yaş kateqoriyalarında daha effektiv idarə olunması istiqamətində həyata keçiriləcək tədbirlərin əhəmiyyətini vurğulayıb.