Rəsul Çunayev 3-cü dəfə tələbə oldu

Yunan-Roma güləşi üzrə olimpiya mükafatçısı və dünya çempionu Rəsul Çunayev növbəti ali təhsilini alacaq. Allsport.az xəbər verir ki, o bu barədə öz İnstaqram hesabında yazıb. Ünlü bahadır Azərbaycan prezidenti yanında dövlət idarəçilik akademiyasına qəbul olduğunu qeyd edib: 

“Uşaq olarkən təhsilin əhəmiyyətini anlamadığım vaxtlarda məktəbə getməyi heç sevməz, dərs oxumaq istəməzdim. Amma böyüdükcə anladım ki, təhsilin insan həyatında böyük və mühüm bir rolu var. Əgər vətəninə, xalqına xeyirli bir övlad olmaq istəyirsənsə, lazım olan əsaslardan biri də təhsildir. Yəni təhsil, həqiqətən də, bir millətin gələcəyidir.

İndi isə Azərbaycan respublikasının prezidenti yanında dövlət idarəçilik akademiyasının tələbəsiyəm və təhsil həyatında 3-cü dəfə universitet oxuyacaq bir tələbə kimi demək istəyirəm ki, təhsil almaq üçün heç bir vaxt gec deyil. Siz də mənim kimi sonradan peşman olmayasınız deyə, verəcəyim ən önəmli tövsiyələrdən biri də budur ki, təhsili öz həyatınızda əhəmiyyətli tutun. Çünki savad hər sahədə lazımlı və vacibdir”.

Çunayev bundan öncə AzDBTİA və BDU-da ali təhsil alıb.