UWW icraiyyə komitəsinin iclasında nələr müzakirə olundu?

Dünya güləş birliyinin icraiyyə komitəsinin növbəti onlayn iclası keçirilib. Allsport.az saytı xəbər verir ki, UWW-nin prezidenti Nenad Laloviçin rəhbərliyi ilə baş tutan vebinarda qurumun büro üzvü, Azərbaycan güləş federasiyasının prezident əvəzi Namiq Əliyev də iştirak edib. 

Dekabrda Serbiyanın paytaxtı Belqradda keçirilməsi nəzərdə tutulan gənclər və böyük arasında dünya çempionatlarının təyin olunan vaxtda baş tutub-tutmaması məsələsi açıq qalıb. Bununla bağlı qərar UWW-nin icraiyyə komitəsinin növbəti iclasında veriləcək. Belə ki, oktyabrın 5-də baş tutacaq həmin iclasda pandemiyanın inkişaf tempi nəzərə alınacaq və ilin son mühüm yarışının taleyinə aydınlıq gələcək. 

UWW dekabrın 1-dək beynəlxalq yarışların bir qismini təxirə salıb, böyük əksəriyyətini isə ləğv edib. Bunlar arasında U-15 Avropa çempionatı, yeniyetmələr və 23 yaşadək güləşçilər arasında dünya və Avropa çempionatları, eləcə də gənclər arasında qitə birinciliyi də var.