Milli Olimpiya Komitəsinin vitse-prezidenti Çingiz Hüseynzadə müsahibə verib. Allsport.az saytı xəbər verir ki, o, ölkə güləşində olan mövcud duruma aydınlıq gətirib, report.az-ın əməkdaşının bütün suallarını cavablandırıb.
– Olimpiya çempionu Toğrul Əsgərovun Türkmənistan yığmasından dəvət aldığına dair xəbərlər, eləcə də Azərbaycan Güləş Federasiyasındakı problemlər nədən qaynaqlanır?
– Əsgərovun Türkmənistana getməsi məsələsindən məlumatım yoxdur. Azərbaycan Güləş Federasiyasındakı ümumi vəziyyət isə hamıya məlumdur. Məncə, Toğrul indi müalicə olunur. Başqa məlumatım yoxdur.
– “Vəziyyət hamıya məlumdur” deyərəkən, nəyi nəzərdə tutursunuz?
– Müəyyən böhran var. Çox yerdə böhran mövcuddur, federasiyada da həmçinin. Ümid edirəm ki, yaxın vaxtlarda həll edərlər.
– Azərbaycan Güləş Federasiyasının rəhbərliyində dəyişiklik gözlənilirmi?
– Gözlənilmir. Bu, federasiyanın daxili işidir.
– Sözügdən federasiyanın prezidenti vergilər naziri Fazil Məmmədovdur. Vergilər Nazirliyi isə imkanlı təşkilatdır…
– Mən bilmirəm, vergilərimi vaxtı-vaxtında verirəm, başqa şeylərdən xəbərim yoxdur.
– Belə başa düşdük ki, oradakı vəziyyət aydınlaşmayıb…
– Bu, federasiyanın daxili məsələsidir. Yəqin ki, özləri həll edəcəklər. Bizim səlahiyyətlərimiz xaricindədir.
– Müdaxilə etməyə lüzum görmürsünüz?
– Hələ ki lüzum yoxdur. Adətən, federasiyaların işinə Yay olimpiya oyunlarına hazırlıq prosesində müdaxilə edirik. Bizi maraqlandıran məsələlər olimpiada ilə bağlıdır. Gündəlik məsələlərə qarışmırıq, federasiya – ictimai təşkilatdır.
– Məlumat var ki, federasiya tərəfindən 2016-cı il Rio-de-Janeyro Yay olimpiya oyunlarından və Bakı 2017 İslam həmrəyliyi oyunlarından sonra da idmançılara mükafat verilməyib…
– Bilmirəm, mükafat verilib, ya yox. Ancaq dövlət tərəfindən bütün mükafatlar verilib. Hesab etmirəm ki, idmançılar narazı qalar.
– İdmançıların aldıqları mükafatdan hansısa xeyriyyə təşkilatlarına vəsait köçürmələri barədə nəsə eşitmisiniz?
– Onu bilmirəm. Bu, hər bir idmançının şəxsi təşəbbüsü ola bilər. Bundan məlumatım yoxdur.
– Ölkə idmanında böhrandan çıxmaq üçün hansısa anti-böhran planı var?
– Yox, ölkə idmanında vəziyyətdən çıxılır, bizdə böyük problemlər yoxdur. Heç bir problem görmürəm.
– 2-ci Avropa oyunlarını təşkil edəcək Minsk şəhəri Bakının hansı təcrübəsini öyrənmək istəyir?
– Azərbaycanın bütün təcrübəsini öyrənirlər və lazım olan bütün məlumatlar onlara verilir. Əlbəttə, ilk Avropa oyunları zamanı Azərbaycanda yaradılmış şəraiti, təşkilatçılığı təkar edə bilməyəcəklər. Amma öz səviyyələrində yüksək hazırlıq görməyə çalışırlar.