7 idmançımızın medalı əlindən alındı

Antidopinq qayda pozuntusunu törətmiş və barəsində idmandan uzaqlaşdırılma qərarı qüvvəyə minən bütün idmançıların dopinq nəzarətinin keçirildiyi zaman əldə etdiyi nəticələri ləğv edilməli və müvafiq olaraq medallar geri alınmalıdır. Bununla yanaşı, onların əvəzinə həmin nəticəyə avtomatik nail olmuş idmançıların yerləri bərpa edilməli və müvafiq medallar təqdim edilməlidir. Allsport.az xəbər verir ki, milli antidopinq agentliyi bu barədə bütün respublika idman federasiyalarına məktub göndərib. 

2019-cu ildə 5 idman növü üzrə 5 yarışda (müxtəlif Azərbaycan çempionatı, Azərbaycan birinciliyi və ölkə kuboku) 7 idmançıdan toplanmış test nümunələrinin nəticəsi müsbət çıxıb və onların barəsində sanksiya tətbiq olunması ilə bağlı qərar qüvvəyə minib. Həmin idmançıların nəticələrinin ləğv edilməsi (mükafatçılar sırasında olduqları halda medalların geri alınması daxil olmaqla) barədə müvafiq respublika idman federasiyaları məlumatlandırılıb. 

Həmin idman federasiyalarından AMADA-ya bildirilib ki, qaldırılan məsələ ilə bağlı müvafiq tədbirlər görülüb. Nəticələri ləğv edilən və medalları geri alınan idmançılar siyahısı:

Həsənbəy Həsənzadə (+109 kq) 2019-cu ildə ağırlıqqaldırma üzrə ölkə çempionatı – I yer
Vasif Səfərov (+109 kq) 2019-cu ildə ağırlıqqaldıraların ölkə çempionatı – II yer
Orxan Zeynalov (81 kq) 2019-cu ildə ağırlıqqaldırma üzrə ölkə çempionatı – II yer
Vüqar Şirinov (52 kq) 2019-cu ildə samboçuların ölkə kuboku – I yer
Aliyə Müslümova (78 kq) 2019-cu ildə cüdo üzrə U-21 gənclərin ölkə birinciliyi – II yer 
Jalə Bayramova 2019-cu ildə güllə atıcılığı üzrə ölkə çempionatı – I yer
Kamran Orucov (63 kq) 2019-cu ildə boks üzrə ölkə çempionatı – III yer.