Gənc qoşaçarxçımız DVM ilə peşəkar müqavilə imzaladı

Azərbaycan velosiped idmanı federasiyası və Beynəlxalq velosipedçilər ittifaqı arasında əldə olunan razılığa əsasən, İsveçrənin Eqle şəhərində yerləşən dünya velosiped mərkəzinə (WCC – World Cycling Centre) yollanan şose velosipedi üzrə U-23 yığmamızın üzvü Ayan Xankişiyeva ilin sonunadək oranı təmsil edəcək. Allsport.az saytı xəbər verir ki, müvafiq yoxlamalardan uğurla keçən idmançımızla artıq peşəkar müqavilə də imzalanıb.

Martın 8-dən etibarən İsveçrədə olan velosipedçimiz burada hazırlıq prosesləri ilə yanaşı, dünya velosiped mərkəzinin komandasının heyətində beynəlxalq yarışlara da qatılacaq. Qeyd edək ki, Ayan Xankişiyevanın dünya və Avropa çempionatlarından başqa, bu ilin sentyabrında Türkiyənin Konya şəhərində İslam həmrəyliyi oyunlarında da iştirakı nəzərdə tutulur.

Məlumat üçün bildirək ki, Beynəlxalq velosipedçilər ittifaqı hər il planetin müxtəlif ölkələrindən məhdud sayda gənc və perspektivli idmançıları xüsusi seçim əsasında dünya velosiped mərkəzinə cəlb edir.