Forgot Password New Account

Qoşaçarxçıların ölkə çempionatına yekun vurulub

Velosiped idmanı
9 oktyabr 2017 / 13:13 Baxış sayı: 1040
Respublika Velotrekində trek növü üzrə ölkə çempionatı keçirilib. Allsport.az saytı xəbər verir ki, 2 gün davam edən yarışda müxtəlif klub və cəmiyyətlərin 70-ə yaxın idmançısı çıxış edib.
 
Proqrama əsasən, iştirakçılar 500 metr, 2 və 3 km məsafəyə fərdi ötüşmə, həmçinin skretç növündə mübarizə aparıblar. Qızlar arasında Ayan Xankişiyeva həm 500, həm də 2 km məsafəyə fərdi ötüşmədə bütün rəqiblərini qabaqlamaqla fəxri kürsünün ən yüksək pilləsinə qalxıb.
 
U-15 yaş kateqoriyasında çıxış edən Nikita Sitov 500 metr və 2 km məsafələrə fərdi ötüşmədə 1-ci olsa da, 7 km məsafəyə skretç növündə Kamran Mirzəxanovu özündən irəli buraxmaqla 2-ci yeri tutub. U-17 kateqoriyasında Nəcəf Bağırov 500 və 2 km məsafələrə fərdi, 7 km məsafəyə skretç yarışında hamıdan güclü olub. Nəhayət, gənclər arasında İvan Orlov 500 metr və 3 km-ə fərdi, 10 km məsafəyə isə skretç yarışında Azərbaycan çempionu adını qazanıb.
 
Mükafata layiq yerlər tutmuş velosipedçilər diplom və hədiyyələr, həmçinin pul mükafat ilə təltif ediliblər.
 

Həmin kateqoriyadan