Şose velosipedində Tokio olimpiadasına

Ölkəmiz Tokio-2020-də kişilər arasında şose velosipedi növündə təmsil olunacaq. Allsport.az saytı xəbər verir ki, bununla bağlı beynəlxalq velosipedçilər ittifaqı milli olimpiya komitəsinə və yerli federasiyaya təsdiq məktubu göndərilib.

UCİ-nin reqlamentinə əsasən, kişilərin şose velosipedində olimpiadaya lisenziya xalları verən yarışlar 2019-cu ilin oktyabr ayında başa çatıb və olimpiya reytinqinin ilk 50 pilləsində qərarlaşan milli federasiyaların 130 idmançısı 4 illiyin zirvə yarışında iştirak hüququna yiyələnib.

Bu müddət ərzində yığmamızın baş məşqçisi Əbülfəz Məmmədovun rəhbərliyi altında heyəti Elçin Əsədov, Samir Cəbrayılov, Musa Mikayılzadə, Mikayıl Səfərli Mahmud Məmmədovdan ibarət komandamız lisenziya xalları verən nüfuzlu beynəlxalq yarışlarda 894 xal toplayıb.

Ümumilikdə UCI-a üzv olan 196 milli federasiyadan 115-i Tokio-2020 yay olimpiya oyunlarına lisenziya xalları qazanıb ki, Azərbaycan milli komandası da onların arasında 44-cü yerdə qərarlaşıb. Qeyd edək ki, şose velosipedində lisenziyalar milli federasiyalara verilir və Olimpiadada mübarizə aparacaq idmançını federasiya müəyyənləşdirir.

Həmin kateqoriyadan