Həndbol üzrə Avropa çempionatı start götürüb

17 yaşadək qız həndbolçular arasında Bakıda keçirilən Avropa çempionatına start verilib.

Allsport.az saytı xəbər verir ki, Bakı İdman Sarayında təşkil olunan qitə birinciliyinin qrup mərhələsində ilk oyun baş tutub.

Yarış meydanına Avropa Həndbol Federasiyasının bayrağı gətirildikdən sonra B qrupunda yer alan Farer adaları və Yunanıstan milliləri üz-üzə gəliblər. Oyun Farer adaları komandasının 27:22 hesablı qələbəsi ilə yekunlaşıb.

Avropa çempionatında 10 komanda 2 qrupda gücünü sınayır. Azərbaycan yığması A qrupunda Bosniya və Herseqovina, Sloveniya, Litva və Gürcüstan kollektivləri ilə yarışacaq. B qrupunda isə İspaniya, İsrail, Yunanıstan, Lüksemburq və Farer adaları komandaları mübarizə aparacaqlar. Azərbaycan millisi ilk oyununu bu gün Gürcüstana qarşı keçirəcək.